<giffgaff>
而家好多人討論買乜嘢電話卡。小弟一家人包括兩個細路都係用giffgaff，貪佢夠彈性，月費多啲少啲隨時可以改。有時如果超過左每個月限額，仲可以提早開始下一個月嘅plan，唔需要俾用多咗嘅data。
喺lockdown前學校有好多短trip去歐洲唔同地方，giffgaff 可以一卡走天涯，差唔多成個歐洲都可以漫遊，乜都唔使做，用返本身嘅data plan已經包埋，十分簡單。不過，有一次細路要去蘇黎世轉機，先知道原來瑞士係不包括喺歐洲漫遊裏面，所以要另外top up俾佢上網。
就算間中要打電話返香港家人屋企(landline)，直接用giffgaff都唔貴，3p一分鐘，啱晒我哋呢啲懶人，唔使成日換卡嘛！