見呢排比較多人問GTI入面咩叫international recognition,所以想整理一下我既見解.首先戴幾個頭盔先.第一,呢個問題冇官方答案,因為澳洲政府唔會好似改卷咁話番俾你聽邊樣計邊樣唔計,我只係望住我見過成功既人報過乜野而話番你聽,當係一個參考.第二,而家得唔一定等於第時得,因為個世界可以變,個籠門可以搬,如果澳洲政府已經收左好多人或者覺有大把選擇,佢可能會提高門檻..第三,唔好問我使唔使寫咁多,因為你唔會知你果期同咩人比賽緊.,我通常叫朋友哂冷,有幾多野寫幾多.GTI去到confirm application前都係一蚊都唔使俾既,如果你連多少少準備功夫都唔想付出,咁成敗風險就自己諗喇.
其實GTI係2019年尾出世,不過果時我睇完以為要拎諾貝爾獎先有機會,所以就冇再理.大半年後,我知道有個朋友報左,所以先再望番.果排我做緊一個同我工種有闗既international award既評審,咁我覺得應該都夠照,所以就走去報,結果係成功既.而我事後先知,原來做過外國野已經有機會.呢個係大多數人最易有既基本盤,所以我會先講多少少,因為點舖排同包裝個效果可以差好遠.跟住我會再講下,有乜其他可以寫,同埋你如果真係乜都冇,可以點博下升呢.我會用IT做例子,但好多概念係其他行業都岩用.
講外國野,大家首先會諗到就係做MNC,呢個係比較易解話既一個方法,但其實又唔一定要既.例如你係香港vendor度幫一間MNC做project,或者你間公司會同外國公司做生意,咁都有幾會講得通.個重點係你工作上既知識有應用係多過一個國家,同埋表現到你有國際視野.相反,如果你係MNC度做但唔會同外國同事溝通,咁說服力就會比較弱.做乜亦唔一定係要做project,做support或者service outsourcing一樣得.其他攞分位包括:接觸過好多國家會好過得一兩個;接觸唔同區域既國家又會好過剩係同一區(例如五大洲vs東南亞);你既隊友散佈係多個地區又會好過集中係一兩個地方;你真係飛過去外國又會好過remote做;你做既公司國際知名又會著數少少;另外可以提下用左咩野世界常用既methodology/framework;單野夠大既又可以提下規模(e.g.幾千萬美金,幾百人團隊),相反,唔大既就梗係避重就輕唔提啦.同一件事,當然你可以好簡單咁寫一兩句,或者好詳細咁寫一個段落,但如果你係個移民官而你咁岩要二選一,咁你選邊個?
其他可以提既野包括:
公職: 好多工種都有佢相對既專業學會或組織,如果佢有跨國野攪而你有幫手就可以寫(最好你係委員或攪手,冇既做義工都照殺).講下你地點同總會或外國分會交流(例如實體/網上會議,比賽,分享會等),點樣提升業界既知識同水平(例如做roadshow或training),點樣攪活動等等.
著作: Publication唔一定要係好formal咁出書或者論文.係而家呢個世代,例如你有寫開blog或者出video都計數.或者你有幫學會寫newsletter或journal又可以講.你係公司或學會有幫過人做training咁個training deck又可以提下(當然要真係你整既).如果你係IT狗,自己起過個網站,又可以擺埋落去.或者你N年前無聊整左隻product又無聊咁拎左張patent,又可以當係自己功績.
專業認證: 有咩internationally recognized既cert就寫哂落去,雞雞地都叫做你既知識同世界接軌.如果你張cert係好罕有既就更加要講下全世界得X個人有.
會員資格: 冇做開委員既,就退而求其次,同你果行有關既會員都寫.最少表現到你有興趣同行家交流,掌握業界最新資訊.
業界活動: 同樣道理,,就算冇份攪都參與下丫.例如我自己有個僻好去外國既conference,夠哂國際視野喇掛.就算你只係去過香港既conference,你都可以睇下佢係咪話自己係international conference或者regional conference.係既咪可以話自己同多國人士交流囉.呢一兩年因為疫情而好多event變左online攪,其實仲多左外國人參與.
咁如果你比較內向,上面講既野你大多數都冇做過,咁又點算呢?其實睇你有幾大決心既o者,好似張家輝話齋,你而家冇,可能第時會有呢.上面好多野,其實用半年到一年,係可以由零變到有少少既.先舉個極端例子,我強者朋友甲,睇完GTI個簡介,就搵左佢一個做Big4既朋友乙,叫佢公司黎緊有咩比賽就留個panel位俾佢,或者有咩seminar就留個speaker位俾佢.咁你未必有佢咁勁江湖地位啦,但係考cert呀,做會員做義工呀,果d係你肯做就多多少少會有成果既.再唔係你可以望下你公司會唔會咁岩發財立品,想整番個國際化豬肉奬,係既咪舉手獻身囉.或者你做IT vendor既,咪睇下有冇機會自己公司既產品發佈會度搶番一個session講,增長下自己張CV囉.
最後想提下大家兩樣野,係你咩行業咩背景都有用既.第一,唔好齋講你有幾勁,要串連到你既威水野點幫到澳洲.例如你攪學會咪話可以幫澳洲提升業界水平,做開training咪話自己會作育英才,就算最行既MNC員工都要話下自己會帶到國際經驗俾當地公司,唔請你簡直係佢地既損失.第二,唔好當個官好熟你果行,用過多行內術語或簡稱.你既目標係一個外行人睇完都感受到你有幾勁同可以點貢獻國家.