最近兩兄妹收到NHS信話要補打針，所以想分享下呢邊登記GP同小朋友醫療相關既野，等各位家長們有個準備。
點樣登記GP應該好多網都有懶人包，我只係好簡單講下：
先去NHS網站搵就近既GP，留意英國NHS既診所同學校一樣有catchment area，你可以係呢個網睇左邊幾間GP服務範圍覆蓋到自己。
https://www.nhs.uk/service-search/find-a-GP
睇下GP既comment
呢個唔使我教啦，Google Map入面其實好多comment睇，NHS上面個網本身都有留言comment D診所。順帶可以click入間GP既網站，有D規模大D既診所會有埋醫生名單，你可以睇下有無識講中文既醫生。
上診所網站登記或者直接去診所攞表格填
填好等NHS通知信，會有你個NHS號碼同登記左邊間GP。
同報學校一樣啦，我填好所有表格，連埋住址證明等等資料send返診所，等左2-3個星期都無聲氣，打去就叫我用網上表格查詢，好，填好網上表格問點解我齊資料都咁耐未收到通知，第二日已經全家收到sms話登記左，呢邊真係唔踢唔做，已經無感覺了。
登記左之後，各位家長要留意了，診所會有機會叫你交小朋友針卡比佢地對，我地個間就比左個表我自己逐支英國必須要打既疫苗對返幾時打，所以我就發覺原來英國呢邊係需要小朋友學前打腦膜炎疫苗，而香港係無咁既要求。有朋友的診所會直接幫你對針卡，也有朋友的診所完全無問，到佢地問返診所先話要交。所以大家可以主動D同診所查詢下一步點做。
咁我填好打針紀錄表，穩陣起見都scan左針卡比診所，大約等左個幾月，突然收到診所Sms叫我聯絡佢地安排兩個細路補打針。過多一日就收到NHS既信話GP會聯絡我補打針，我估診所早過我收到NHS通知所以主動聯絡我。約左開學後一個星期放學時間去打，由於疫情原因我地要係門口用對講機登記，之後等護士叫我地入去。原本都擔心緊究竟要打幾多支針，因為有朋友話佢個小朋友（年紀細過我兩個）一次過要補打三支針，我見封信上面有幾樣病都要打返我覺得都要打幾支，好彩護士話佢地有混合針所以打返一支就得啦，好彩！哥哥好叻一D都無喊，眯埋眼就捲起衫袖比護士打，護士手勢都好好哥哥話唔疼。到妹妹就慘了，個朝已經話唔想去打針，到佢個下即刻爆喊，你明唔明我地要用廣東話氹佢而護士姐姐係唔知你講緊mug所以個氣氛係幾咁尷尬...最後媽咪抱住佢，護士就係佢重想掙扎個千鈞一髮吉支針去手臂，見住妹妹肌肉繃緊曬我幾驚支針斷...有驚無險結束左呢個短暫既打針旅程，返屋企按照出發之前同佢地既約定上Amazon一人買左隻公仔...
Touchwood我地一家過左黎幾個月都未使睇醫生住，不過大人細路都病過， 下個post分享下出發前關於醫療既一D基本準備同呢邊買成藥既情況。