Apply National Insurance

Gofunla

14分鐘KO傳說之NI申請.

嚟咗英國3個月，仍未提起勇氣申請NI，因為實在太多人同我講打咗幾個鐘電話，最後都唔比申請，叫你等Job Centre開番先。今日，我戚起條筋去試打，諗住唔知要等幾耐，於是沖杯咖啡食住下午茶等啦，點知等咗約5分鐘就有真人接聽，前後用咗14分鐘就完成，成功取得reference number，簡直係意外驚喜！

有時，即興真係順利過well planning。😝

分享埋以下問題，未申請嘅打電話前準備定以下資料啦：

申請原因（梗係looking for a job啦）
幫人申請定自己申請
幾時抵英
姓名 (先問姓，後問名）
出生日期
住址 (先比postal code)
電話號碼
國籍（揸BNO就答British)

跟住佢就比個9位數字嘅reference number 你，等收信，再跟信件指示上網完成手續。

未申請嘅，祝你好運!

Gofunla

National Insurance Number 簡稱NINO或者NI Number，中文係國家保險號碼。
佢係每個人係英國工作同生活必不可少嘅號碼，用嚟工作扣稅、申請政府補助及福利、申請學生貸款、退休金管理同買賣投資產品等等，所以每個人都應該申請一個方便自己。
工作人士係必須具備NINO，不論打工（全職/兼職）或者自僱都要用到，因為自僱人士同僱主都會用到呢個號碼嚟報稅同扣稅，冇號碼就扣唔到稅，而真正到我哋手嘅錢就係經過NINO扣稅後嘅淨工資喇！強烈建議搵工前就準備好，咁就方便得多。
通常英國人會係16歲左右就會收到自己嘅NINO，而外國人係要自行申請嘅，包括拎住各種有工作權利VISA嘅外國人，e.g. Tier4 同Tier 5持有人，相信未來BNO人士成功拎到居英VISA後都要自己去申請NINO。
以下會介紹申請NINO嘅步驟，唔同地方可能會有少少差異，但相同嘅係申請人必須身處英國同係英國擁有工作權利先可以申請。
第一步係打電話去申請熱線，電話係0800 141 2075（星期一至五8am-6pm)。呢個電話要打耐啲先有人聽，所以唔好急住cut線。打通咗電話之後同職員講要申請NINO，職員會問啲基本問題，e.g.名、電話、國藉、地址、簽證資料同申請原因等等，之後會約時間地點（Job Centre)去面試，最後抄底佢比你嘅Reference Number備用（問進度/跟進），等佢寄確認信去你住址。
第二步係跟住預約時間同地點去面試，通常係離你最近嘅Job Centre，帶齊文件，包括確認信原件、護照、BRP、地址證明（水電銀行帳單、租約都可以）、僱傭證明等等，實際文件因應身份有所唔同。通常工作人員會一邊問問題一邊幫你填表，所以問題會跟住份表而問得深入少少，會問埋婚姻、家人、工作同居英時間等等。最後對好資料同簽名之後就可以拎到臨時證明文件，大概4星期就會收到信知道自己NINO。
提提大家，NINO冇得網上預約，由打電話到面試再到NINO都要至少一個月，所以建議大家盡快申請。