唔只係移民前，你過到去都要有銀行户口先可以過到香港啲錢過去、做嘢都要有户口，人哋先出到糧畀你。所以到埗後，最好就快快脆脆開返個銀行户口。
開户口最怕就係帶漏文件，所以今日就話畀大家聽有咩文件要帶，等大家可以照住執。
喺加拿大開户，需要兩份身份證明文件（ID) 同埋地址證明、移民證明、工作證明同學生證明（如有）。
所謂嘅ID唔係身份證，而係指證明到你身份嘅文件。要帶兩份過去，有三種唔同嘅組合選擇：
- 兩份 A 類文件
- A 類同B 類各一份
- 一份 A 類文件再加上一個在加拿大信譽良好嘅人親自喺銀行為你確認身份
A類文件：加拿大駕駛執照 / 加拿大護照 / 加拿大出生證明 / 社會保險卡（SIN）或健康保險卡 / 入籍證明（公民證）/ 永久居民卡 / 由指定機構發出帶照片並附簽名嘅身份證明文件
B類文件：當地工作證明 / 銀行卡 / 加拿大信用卡 / 外國護照
加拿大嘅銀行設有存款利息稅，如果大家係想開設可以賺利息嘅賬戶 e.g. 計息帳戶 / 註冊退休儲蓄計劃（RRSP），就要喺開戶嘅時候提供埋社會保險號碼（SIN）。
開戶嘅程序可以選擇親身去銀行開 / 網上開戶服務。
選擇親身去銀行分行辦理開戶：只要帶齊文件，即日就可以成功辦理，攞埋臨時扣賬卡，其他文件就會陸陸續續寄返去你所填嘅地址。
選擇喺網站申請開戶：只需要提供基本個人資料、加拿大地址、工作資料、社會保險號（SIN）
***加拿大銀行只接受身份證明文件嘅正本，唔好帶錯啊！