「到埗🇨🇦一年」
好記得一年前剛到步Richmond，當時講得最瀟灑嘅一句就係「求收入嘅就留係香港啦，所以唔介意黎到加拿大收入低d。」
但係當收入打左6折，然後支出基本同香港差唔多嘅時候，問題就來喇，「窮」。
但窮則變，變則通。
解決呢個問題離不開「開源」＆「節流」。而我個情況係想多d時間陪屋企人，黎得加拿大都係想咁姐，因此我選擇左「節流」，即係慳啲啦。
鬼唔知呀媽係女人咩，咁點慳？
首先要改變下香港嘅購物習慣，以前由於香港太方便，屋企又細，好多日用品都係就快用完先買。但呢個習慣黎到加拿大就要改，應該要趁佢減價就入多d貨，放入storage locker。小數怕長計。呢個時候超市嘅app就好有用，可以提前知道有咩減價品。同埋只唔好去一間超市，雖然overall係walmart平d，但偶爾superstore同tnt會有驚喜。但我自己就無去costco，一黎要年費，二黎以我觀察唔係平好多。
住係richmond其中一個最大嘅難關就係要對美食把持得住，因為出街食係貴的。茶餐廳食個早餐連貼士埋單大約15蚊加紙（即90蚊港紙），香港差不多已經可以食個all day breakfast。自己煮嘅話最大嘅問題係份量太大，家中兩口子食量唔高，就咁放入雪櫃幾日又怕變壞。於是我會將佢分做幾份，唔急住食就放急凍，要食就拎出黎解凍。呢d係香港真係唔會咁做。作為蔥嘅愛好者黎到可能要喊三聲，係香港買蔥一兩蚊比一大扎你，呢度都係一蚊，不過係加紙。但我最近發現其實係可以切剩個蔥頭，放入泥度得閒淋下水，就可以不停食，就唔使咁肉痛。
講開買送，又講埋租樓。
當大家初黎步到，又未有咁快有車果陣，我會建議大家揀啲近超市嘅單位，咁樣只你有部買送車，你就可以行動自如。生活係加拿大，除左返工返學，來回得比較多嘅一定係超市。但返工返學其實你可以買月票，呢度d公共交通公具都算方便，Google就可以check晒d到站時間同路程。順帶一提，好多人會話呢度車係必需品，我就覺得未必，雖然有車係方便好多，但無車唔會死，而且就算佢成為左「必需品」唔代表養車好平，尤其係當你收入減左嘅時候。
買家私又可以點慳？
其實Facebook marketpalce都有好多平靚正嘅家私可以選擇，但如果大家好似我咁，有d潔癖，鐘意買新家私，咁呢度最平一定係ikea。慳錢方法就係自己動手安裝，經自己手裝點都安全d。不過如果大家準備8／9月過黎可能好多product都無貨，如果真係無得買又趕住用，可以考慮埋一間叫jysk嘅家私店，價錢都唔算太貴。
總結
太耐無update大家可能係因為我真係開始習慣呢度生活，無一開始咁多「大驚小怪」。希望可以保持初心，分享多d係加拿大貼地生活嘅資訊比大家。