記得以前仲會興有一部細細哋嘅導航，不過自從電話嘅 App 盛行之後，都逐漸冇人再用，連之前以導航起家嘅 PAPAGO 都轉出汽車鏡頭果啲。喺香港，一直都係用 Google Map，嚟到呢度，買車時個 sales 叫我試吓轉用 Waze，話佢同好多人都會用呢個，轉用之後，就好少再開個 Google Map，下面講吓個 app 有咩比 Google Map 優勝。
同 Google Map 一樣，Waze 都係免費 app，係 2008 年由以色列公司創立。我最欣賞個 app 以下幾點：
✅ 配合 UGC (User Generated Content)，由用戶即時報告邊度有壞車、有警察影快相、有整路等等
✅ 最新油站價錢資訊－喺英國，一般大超市嘅油站會比起普通 Shell / BP 等價錢平啲，你可以跟價錢去搵最近你嘅油站去入油
✅ 超速同快相/紅燈相機提示－香港嘅快相機，通常有 5 km 左右走盞位，但個個都話英國呢度捉得好嚴，少少都唔超得，Waze app 有超速提示，一過當時道路嘅限制就會提醒你；同樣快相機呢啲都會有倒數提示
✅ 同你電話嘅行程表 (Calendar) 資料結合，自動到時到候提醒你出發。好似我電話係連結咗曼聯賽程表，開波前兩三個鐘就會提我出發 😅
✅ 語音導航可以揀聲，有世界各地嘅語音揀 (包括廣東話，但就當然講唔到英國街名)，之前曾經限時有明星把聲揀，例如 Morgan Freeman，但而家就唔見有
不過，Waze 始終係一個汽車導航 app，唔似得 Google Map 咁，有公共交通工具、步行或者單車嘅時間同路徑揀，呢樣係兩者最大分別。