原文 https://www.facebook.com/101954155254567/posts/159472782836037/
英國舊樓問題雖然五花八門，但其中吸引原因在於位置通常比較就腳，出入市中心公共交通工具方便，而且相對呎價比同地段新樓平，所以長期有追捧客。但係其實新樓如果響非核心城市的話價錢就非常吸引，亦有機會鄰近好學校，若果肯花少少心思都可以執到寶。
近期幫一個香港家庭響 #Reading #驗收新樓 (handover inspection) 同埋做 #驗樓報告(snagging report)，發現就算係細開發商做出嚟嘅成果，手工同埋用料都確實唔錯(放心唔係樓盤廣告所以唔會開名)，不過當中有啲設計細節考慮，忍唔住想喺呢度同大家分享一下。
（純粹分享，班門弄斧，望各同業前輩高抬貴手，插少幾下。）
背景：1300尺半獨立屋，四房四廁（雙套房）客飯廳連兩個車位（有充電樁）
設計細節考慮：
- 雪櫃尺寸
呢間屋應該定位為四人家庭使用，但係可能由於廚房設計遷就平面圖開則或者因為成本考慮，所以做咗個相對比較細嘅 #嵌入式雪櫃，整體非常美觀但係儲存量稍嫌不足，所以最後都推薦主人家多買一個冰櫃(freezer)去滿足日常生活需要。
- 洗手盆 vs 採光窗
驟眼睇落其實未必發現到問題，但係當預備佈置家具裝修嘅時候，就會發現洗手盆上邊騎咗半隻 #採光窗，冇辦法置中裝到正常大細嘅鏡櫃或者梳妝鏡。
- 樓梯燈光
樓梯同平台(Landing)比一般開則設計窄及深，正常情況由平台燈光照亮樓梯嘅安排略欠不足，適宜響樓梯增加燈點，令上落比較安全。
- 衣櫃大鏡
開發商響 #入牆趟門衣櫃 做晒全身鏡，睇落空間感十足，但係考慮日常使用嘅時候其實有機會比鏡中倒影影響到心神不定，最後建議業主將部份位置貼上磨砂膠片。
- 屋頂生口位位置
主人套房位於 #閣樓層，面積非常寬敞，但係設計將高位儲存空間嘅 #生口 佈置左響成間房嘅天花板正中心，有啲美中不足。
- 草地步行小徑
後花園面積雖然唔大，但係睇落都四正，不過發現成個草地基本上冇佈置 #步行小徑，若果去後門出入就一定要經常踩上一段固定嘅草地，久而久之可能嗰條小路嘅草地效果就會比其他地方差。
其實以上都只係設計上嘅小瑕疵，唔算係大問題。反而我對成間屋入面有啲細微部份都幾欣賞，例如樓梯各部件批角收口就頗為細心，簡單正方形切面變咗八個形之後，使用上就感覺舒服好多。
驗樓問題：
- 花園玻璃門收口
玻璃門手工同材料都算正常，但係偏偏門框底部細心留意發現短左5mm，明顯暴露咗裏面嘅部件出嚟。
- 加熱毛巾架
兩個洗手間驗樓嘅時候都發現 #加熱毛巾架 heated towel rail 部份地方因為安裝嘅時候可能略為粗魯，所以撞凹咗。
- 底層地板
部份地氈下 #底層地板 subflooring 鋪裝不平整，行走嘅時候偶爾發出噪音，如果係舊樓勉強可以接受，但係零首新樓呢啲絕對需要執好。
除咗呢啲小問題之外，其他嘢都整體做得非常唔錯，加上發展商都合理肯跟進以上問題，所以驗樓報告都算能夠物盡其用，另外今次驗樓亦都加深左我對於呢個發展商嘅好感。