原文 https://www.facebook.com/111213480669774/posts/142557277535394/

買名校區樓同埋賭博，兩者聽落去大纜都扯唔埋，點解我哋會咁樣講呢？
遺憾嘅係，我哋並非標題黨，亦唔係「Errr... Errr.. Errr...I cant find the right word.....」而亂講。大家唔好笑， 英鄰係真心嘅，且聽我哋講落去。
#我哋唔負責亦唔打算tum你哋 #我哋只想大家認清形勢

利申先：大家可能會發現英鄰今次講嘢會比較直接，先講句唔好意思。不過，我哋認為呢個係各位家長必須了解清楚嘅情況，所以唔希望sugarcoat 任何嘢。

好，利申完，我哋入正題。
我哋幾時都話，家長係世上最偉大嘅群體。（各位嘅苦心同付出，相信子女大個咗一定會明白！）
為咗幫子女鋪條最好嘅路，好多家長都盡量開源節流，自己唔捨得食，唔捨得買新衫，唔捨得買自己嘅心頭好，都係為咗儲多啲銀兩，希望入住「名校區」，maximise 子女入好學校嘅機會。
呢樣嘢喺香港如是（近來英鄰聽講41校網再次成為熱話），喺英國就更加relevant，畢竟as of today 相信大家都大概知道state schools (絕大多數Grammar Schools 其實都係state schools)嘅admission policy。簡單嚟講，除咗員工子女、兄弟姊妹喺同一間學校讀書、宗教因素等等會有priority之外(Grammar Schools 同其他Selective Schools仲要計埋考試！！！），主要嘅就係一個鬥住得近嘅比賽，比起香港嘅玩法更加公開、透明、直接。因此，好多家長都係不惜工本，搶購一啲最靚區份嘅樓，一時間，非常火熱，熱門區份多咗好多bidding war ，價錢升到歷史新高。
當然，好多家長嘅心態係只要入到好嘅state school，貴少少都無問題，畢竟比起喺香港入讀international school，又要排隊，又要買學卷，已經相對抵好多。

問題來了，到底係咪住喺呢啲好區就真係mission accomplished? 遺憾嘅係好多人只係知道事實嘅一半。

除非時間較得啱啱好（當然，即係無論如何都要插小學班。不過小學插班相對較易，有機會先再講），趕得切參與正式中學報名以及派位程序，否則其實絕大多數嘅小朋友都要面對中學插班嘅問題。
插班，唔係都係鬥近咩？我住得夠近咪得？ 唔好意思，唔係咁簡單架葉師傅。
中學插班的話，即係所謂嘅''in-year application'"，先決條件係學校喺嗰個年級有位，否則無論住到幾近都無用。
大家要明白，好嘅中學，其實絕大多數喺year 7 正常收生嘅時候已經係oversubscribed (即係排呢間學校做第一志願嘅人數多過佢最終錄取嘅，可以視為「太多人報」。我哋知道坊間有時定義oversubscription 為實際學生人數大於學校理論上可收嘅人數，即No. of Students 多於School Capacity，我哋會傾向叫呢啲做「超收」。）
絕大多數時候，仔女咁難得入咗好學校，家長當然想佢哋繼續升上去，如非必要（例如家長因為工作關係或者其他重大原因要搬屋）都唔想佢哋轉校。聰明嘅你會明白到，學校越好，家長唔想子女轉校嘅決心就越大。
With that in mind，咁少學生轉校走，邊有咁多位俾你哋子女插班呢？無位的話，住到幾近都無用。當然，我哋身邊亦有朋友試過附近無學校有位，結果請求Council 格外開恩，安排佢嘅仔女入學心儀學校。不過，我哋必須強調，呢啲只係個別特例，並非常規。根本上一切都只係取決於當時處理你哋個案嘅人員嘅一念之間，非常危險。佢哋絕對可以唔接納呢啲請求，繼而安排你哋子女去一啲有位但好遠，成績校風亦冇咁好嘅學校。
講到呢度，係咪開始明白英鄰點解話就算買到名校網嘅樓，插班都係一場賭博？
===「名校區」Altrincham & Sale West===
就咁講可能比較抽象，等我哋用Greater Manchester非常熱門嘅「名校區」Altrincham & Sale West 做個analysis。
的確，Altrincham 係有唔少好學校，不過，到底插班入到去嘅機會係點呢？
=====如果閣下嗰位係千金的話=====
Altrincham 總共有7間中學可以入讀（其實有一間喺Sale West 嗰邊 － Ashton-on-Mersey School ），分別有3間outstanding，4間good 評級嘅學校。
首先，入讀2間outstanding 嘅學校本身已經難度好高，Altrincham Grammar School for Girls 以及Loreto Grammar School 兩間都要考試入，就算閣下囡囡好叻，都要夾啱天時，無miss deadline 考試，仲要考得高分，先可以落到waiting list，因為前面已經好多人排緊。簡單嚟講，插班呢兩間就太難啦。
英鄰，我都明白，從來都唔奢求入grammar schools，咁仲有咩中學淨呢？
Altrincham 啲話，仲有一間Non-selective 嘅Outstanding School，即是Blessed Thomas Holford Catholic College （mixed)。不過大家又知唔知呢間學校已經連續好多年oversubscribed? 事實上，間學校已經盡量收生，本身理論上只可收1300個學生，佢哋已經收咗1487 個。喺咁嘅情況，除咗有人走，佢又有幾大機會俾閣下小朋友插班呢？
好好好，唔貪心，Good 都已經好開心了，附近仲有4間Good Non-selective Schools。遺憾嘅係，Wellington School 與及North Cestrian School 分別oversubscribed 31% 同埋19%，此外亦於同Blessed Thomas Holford Catholic College 一樣，本身超收已經好嚴重，難以再開學位。
餘下嘅兩間，其實Altrincham College 都有30% oversubscription，不過機會叫做大啲，因為佢哋number of pupils 係低於school capacity ，in theory 仲可以開位。不過你又知唔知呢間學校GCE 成績排喺全英bottom 30%，而且長期2成學生缺席？
至於Ashton-on-Mersey School ，其實係喺Sale West，由Altrincham行去要50分鐘，搭車要20幾分鐘，揸車就10分鐘。再者，其實呢間學校本身雖然in theory 可以容納多超過一百個學生（School capacity: 1561 ; Number of pupils:1425)，但佢哋其實都係oversubscribed by 35%，唔係一定開學位架！
=====如果閣下嗰位係公子的話=====
情況其實更差。該區總共有7間學校選擇，2間outstanding, 5間Good。
Outstanding 嘅學校，Altrincham Grammar School for Boys屬於Grammar School ，而且有好長waiting list，基本上可以唔駛諗。至於，non-selective 嘅mixed school Blessed Thomas Holford Catholic College 嘅情況上面已經講咗，不再重覆。
至於Good 嘅5間學校，當中有4間（Altrincham College、Wellington School 、North Cestrian School以及喺West Sale 嘅Ashton-on-Mersey School ）係mixed schools，前文已經分析咗。最後淨返嘅一間，Saint Ambrose College 就係一間Good 評級嘅Grammar School，可能係太多人查詢，佢哋官方網址直情講明： "St Ambrose College is a Catholic Grammar school and we are currently oversubscribed and there are no places available for any year of entry."

情況有幾嚴峻，你懂的。

總括黎講，你哋無睇錯，根本上Altrincham 及Sale West 嘅所有state schools 就算喺香港人未大批去之前都已經係oversubscribed，所以就算咁貴搶購Altrincham 嘅樓（價錢已經直逼西部甚至南部某些好區），都絕對有機會無一間同區學校收你哋嘅仔女。當然，Local Authority有責任分配學校，所以唔會冇書讀。只不過，咁嘅價錢搶購Altrincham 嘅樓，如果結果只係派咗去其他Trafford 地區嘅學校，就未免令大家大失所望了。
你可能會話，天無絕人之路，咁多香港人去，可能會酌情安排，唔會要小朋友山長水遠跨區嘅。Well，呢個就如同一個賭徒嘅諗法，英鄰就唔buy 啦。畢竟，駛咁多錢都只係買一個渺茫嘅機會，希望相關人員格外開恩，實在太唔理智。人最怕嘅，並唔係自己唔夠努力，做唔足準備工夫，而係就算做晒自己所有嘅嘢，主動權都唔喺自己手上，呢種感受係最難受。
試想下，如果一般賭博輸咗，只係輸咗錢。之但係，如果喺學位難求嘅地區咁樣賭博，博輸咗，晒錢事少，仔女被派去一啲距離屋企好遠，校風成績都唔係最理想嘅學校，就真係會大失所望。畢竟，如果係咁嘅話，點解要高價揀呢區住？
===講左咁耐，到底英鄰有冇咩建議？===
當然，有別於盲目追捧名校區，我哋自有一套插班嘅策略。
首先要講清楚，所有插班申請都係一場賭博，如果有人，甚至係我哋，同你哋講，可以guarantee 你哋嘅仔女入到好嘅state school，你哋必須小心，因為好明顯係講緊大話。否則的話，就係我哋能夠未卜先知，應該問埋下期六合彩嘅號碼。
不過，既然係賭博，就必然牽涉機會率。
所以，logically speaking，部署插班最合適嘅方針，就係盡一切可能，minimize 主動權落於他人手中嘅可能性。
講就輕鬆，點樣可以做到呢？答案就係挑選一啲未被炒起，但係其實附近有好學校（當然，grammar schools 以及outstanding 學校一般都已經嚴重oversubscribed，所以我哋target 嘅係一啲校風、成績好嘅"Good" Schools)，治安亦良好嘅underrated地區。